拜仁細贏揭幕戰

猪拉多纳

試緊陣難炒慕遜加柏
新一季德甲今晚開鑼，揭幕戰班霸拜仁慕尼黑主場迎戰慕遜加柏，拜仁喺德國盃首圈作客半力大炒列頓，加埋季前嘅電訊盃決賽曾經大炒慕遜加柏5比1，再遇啱啱喺德國盃首圈畀丙組仔淘汰嘅慕遜加柏，主W賠率熱到辣手，不過考慮到慕遜加柏嘅硬朗防線經常可以困擾拜仁，主隊喺新帥哥迪奧拿帶領下仲不停試緊陣式同踢法，現階段唔容易大炒對手，今場大細中位數調整到3.5球，黑柴推介1.85倍細盤。

（有線61及201台周六凌晨2時30分直播）

拜仁季前熱身賽始終贏唔到掌聲，哥迪奧拿嘗試嘅「4141」、「巴塞式」嘅短傳中路入滲同埋無鋒陣都惹人詬病，球隊踢法比上季沉悶得多，而且熱身賽不能作準，睇番季前最重要嘅正式賽事德國超級盃，佢哋就畀多蒙特技術擊倒，雖然哥迪奧拿喺其後嘅德國盃對陣式上已經作出妥協同微調，但組織進攻嘅爽朗程度仍然無法同上季相比，今晚主場踢聯賽揭幕戰，哥帥賽前又心大心細想試吓「433」陣式，但從賽前分隊賽觀察，一雙箭頭文迪蘇傑同比沙路都唔喺正選隊，如果再用無鋒陣，要撕破慕遜加柏防線將會更加困難。

敲埋4.15倍「讓球和」
慕遜加柏喺電訊盃對拜仁好明顯只係輕裝上陣，德國盃踢足120分鐘咬唔入丙組仔達斯泰特，最終射輸埋12碼，不過無損士氣，後防主將贊迪斯基賽前仲話球隊已經準備就緒，個個情緒高漲，好有信心交出好表現。慕遜加柏今季增兵得宜，上季喺弗賴堡大放異彩嘅攻擊手麥斯古斯、曾効力哈化柏林同史浩克04嘅巴西鋒將拉菲爾基達奴，同向利華古遜借用嘅德國U20中場基拉馬都係實力派，況且球隊防線已夾熟，憑硬淨踢法足以困擾拜仁鋒將。今場入球大細中位數去到3.5球偏高，細盤可捧，黑柴相信拜仁贏2比0機會較高，如果求好分，可以敲埋有4.15倍嘅拜仁「-2」嘅「讓球和」。