嚴懲騎師走死位

猪拉多纳

　　近日講過騎師比賽時的態度，唔好兜大彎、過早放棄、避免「外遊」等，都係1位專業騎師必須遵守的。其實，仲有好多地方，騎師應該注意，以及謹慎處理，咁先至對得住普羅馬迷。

　　必須殺一儆百

　　大家都知道，騎師在賽事中取位好壞，直接影響到坐騎成績，雖然話千鈞一髮，有時在早段、中段或末段揀出揀入，好難有標準，亦未必咁多時候畀個騎師考慮，但若然刻意走死位，理應嚴懲。

　　打個比喻，轉完直路，內側一大堆馬塞到水洩不通，個騎師仲係要選擇在內推進，咁樣做根本與撼頭埋牆冇分別！如果競賽小組遇到呢啲個案，唔好只聽騎師一面之詞，循例問完就算，應執得嚴啲，所謂殺一儆百。