波圖5連霸穩陣

猪拉多纳

甘馬雷斯未夠班爆冷
葡超盃由上季聯賽冠軍波圖對上季葡盃盟主甘馬雷斯，自09年起葡超盃改喺阿威羅舉行之後，波圖就直落4度捧盃。今年遇到實力唔強嘅甘馬雷斯，相信波圖極有機會再度勝出，締造5連霸威水紀錄，「讓球主勝」值得捧場。（有線155台周日凌晨3時45分直播）

波圖近年喺葡萄牙惡到打橫行，一對首都球隊賓菲加及士砵亭都唔夠揮。以前所講嘅葡超「Big3」已經名存實亡，波圖獨大已成不爭事實。既然里斯本雙雄都搞唔掂，甘馬雷斯就更難睇好。話就話波圖有唔少球員被賣走，如占士洛迪古斯以及摩天奴季前都已轉投摩納哥。

不過陣中仍有唔少高質新秀可派上場，特別要留意係哥倫比亞新星祖安昆特路，此子喺世青盃表現搶鏡，左腳仔有腳法又有腳頭，相信到葡超必有一番大作為。唔好忘記，哥倫比亞球員如法卡奧及積臣馬天尼斯都能夠喺波圖取得成功，祖安昆特路今季係葡超大放光芒唔出奇。

近兩次對賽都吞4蛋
甘馬雷斯近期頻頻「拍跳」以催谷狀態，但其實演出認真麻麻，剛賽更以大比數1比4不敵基維辛迪，睇落狀態仍有不足。況且近兩次對賽都以0比4不敵波圖，今場都幾難打破不利數據。葡超盃強弱分明，「讓球主勝」開出機會極高。