朗尼翻身立功 三獅兵「蘇」哥利

猪拉多纳

英倫世仇打足百幾年
國際友誼賽唔講友誼！今晚英格蘭溫布萊主場對蘇格蘭嘅「英國內戰」，源於歷史背景，早就有個「親密敵人」嘅稱呼，雖然大家關係密切，但敵對情緒高漲，賽前兩軍名宿都出嚟撥火，真係恩怨情仇一朝了。「三獅兵團」為咗贏波，領隊鶴臣據聞將會派曼聯「雪櫃兵」朗尼擔正，要知道「魔童」之前踢親國家隊都着晒火，今仗打爭氣波仲點會留手？一於捧1.95倍「讓主」啦！（now621台周四凌晨3:00直播）

咪以為英、蘇兩軍依家唔係世界最頂級球隊，今場熱身賽就唔重要，查實兩軍史上第一次碰頭出現喺1872年，呢場友賽一直被視為國際足球歷史上首場國際賽，意義重大。之後兩班波每年都會交手，直到14年前先結束，想當年經典對賽唔少，依家仲有英蘇球圈中人倡議復辦對抗賽添！

「魔童」踢國家隊多波入
雖然話蘇格蘭近年國際賽戰績低落，但英格蘭要砌低呢位「親密敵人」都唔可以大意，好彩「三獅兵團」領隊鶴臣為應付嚟緊嘅世界盃外圍賽關鍵戰，早就決心精銳盡出，全力練兵。近排同曼聯鬧到好僵、一直稱傷只喺季前熱身賽踢過一場嘅朗尼，周一嚟到英軍大本營訓練後，鶴臣見佢操完一課，就話佢狀態OK，傷勢無大礙。

蘇格蘭三線都唔齊腳
係真係假都好，鶴臣起用朗尼卻係毫無疑問。事實上，「魔童」近4次披起英格蘭戰衣就轟入5球，近9次為國家隊上陣有8個入波，英軍前線有佢肯定生晒，就算賽前有快翼艾舒利楊格因傷退隊，擁有韋舒亞、禾確特同林柏特等組成嘅進攻線，要入波都應該唔難。值得一提，英格蘭今晚仲有上季英超首席本土射手列基林拔候命，呢位有望成為英格蘭史上第3大年紀作國家隊處子戰嘅31歲前鋒，如果有機會騷哥利，肯定會搏命爭取入波啦！

蘇格蘭呢邊，相比起上場贏克羅地亞嘅陣容，雖然獲多位主力歸隊，但三大重臣前鋒史提芬費查、中場費查同守將卡達維都繼續因傷病問題缺陣。賽前佢哋仲有白禮頓中場比列格鼠蹊受傷退隊，前線搵食又要靠已經去咗美職搵食嘅堅尼米拿孭飛，講實力同卡士真係輸晒，就算有超強鬥志，都係信唔過㗎！