英超新秩序 Big4大執位

猪拉多纳

領隊變 球星變 形勢跟住變
新季英超變天，曼聯名帥費格遜退休，由莫耶斯繼承霸業。寸王莫連奴回歸車路士，比歷連尼接掌曼城，3支前列球隊齊換帥，領隊變動成為球迷一大焦點。英超20路大軍今夏暫時已豪擲3億鎊（約36億港元）擴軍，數字冠絕全歐，單單轉會都備受矚目。不過，無論點變，Big4舊勢力仍然主宰爭霸形勢，最終冠軍將不出曼聯、曼城、車路士同阿仙奴呢4支傳統勁旅，但Big4新季喺組軍方針同收購策略方面落差好大，故預期英超將出現全新秩序，上季4強排名勢必出現大執位。

兩個莫帥 卡士有別
英超進入後費格遜時代，今夏最矚目焦點係巨星級名帥莫連奴重返車路士，冇咗老對手費Sir阻頭阻勢，寸王更加肆無忌憚，一嚟就出招搞曼聯新帥莫耶斯，多番表明要撬走「紅魔鬼」當家星級朗尼，一度令曼聯軍心大亂。

車仔本身已經有盧卡古、費蘭度托利斯及丹巴巴亞等射手，前線現人滿之患，莫連奴斟朗尼分分鐘只係為咗搞亂曼聯檔攤，佢隨便講幾句，已令莫耶斯出現任內首個管治危機，真係唔同卡士。莫連奴04至07年帶領車路士期間兩奪聯賽冠軍，連費格遜都唔係佢對手，今季睇車仔個陣容已經好有冠軍相，莫耶斯同佢鬥，未開咧個勢已經輸晒！

曼城續施 銀彈政策
曼城就再次以本傷人，新帥比歷連尼使咗近1億鎊簽下4大天王費蘭甸奴、祖維迪、捷西斯拿華斯及尼格度，佢話好滿意現有人腳：「曼城擁有全英超最勁嘅陣容，我哋簽咗4位好勁嘅球員，相信班波會進一步升呢！」今次並非比帥首次施展銀彈戰術，佢於09至10季度執教皇馬期間就試過豪使2億鎊（約2.4億港元）買入C朗同卡卡等巨星，但最終得個吉！

佢當年離開皇馬時曾表示：「皇馬簽咗好多超級球星，但並非球隊需要嘅球員，大軍攻守唔平均，點贏？」但佢講一套做一套，曼城今夏只簽中前場球員，忽略後防，頭重腳輕係佢哋今季最大問題。

慳家雲格 全力保四
比歷連尼亂使錢，而阿仙奴主帥雲格就仍舊「鐸叔」，今夏全力進行減磅計劃，放走箭頭謝雲奴、艾沙維同查馬克等，但只係簽咗年輕前鋒耶耶辛洛高，暫時未有大手筆買人。不過，「兵工廠」勝在未有流失主力，新季將會繼續食老本，仍然有力保住Big4之名。

環顧其他前列球隊，熱刺受到加里夫巴利轉會傳聞困擾，利物浦則出現蘇亞雷斯嘅「叛亂」，兩軍主將都有離心，恐怕會削弱球隊爭入前4嘅機會。綜觀全局，Big4爭霸之勢雖然持續，但排名方面相信好大機會要重新執位嘞！

排名大預言
名次 上季排名 今季預測

1 曼聯 車路士

2 曼城 曼城

3 車路士 曼聯

4 阿仙奴 阿仙奴

5 熱刺 熱刺

6 愛華頓 利物浦

7 利物浦 愛華頓

8 西布朗 史雲斯

9 史雲斯 修咸頓

10 韋斯咸 紐卡素

11 諾域治 西布朗

12 富咸 阿士東維拉

13 史篤城 諾域治

14 修咸頓 韋斯咸

15 阿士東維拉 新特蘭

16 紐卡素 富咸

17 新特蘭 卡迪夫城（冠1）

18 韋根 史篤城

19 雷丁 水晶宮（冠5）

20 昆士柏流浪 侯城（冠2）