卡爾斯魯厄平手打「雷」

猪拉多纳

今晚德乙卡爾斯魯厄主場鬥格雷特霍夫，仔細啲睇原來係上季德丙盟主鬥德甲榜尾嘅對決。雙方季初開局戰績雖然都係咁標青，但格雷特霍夫進攻核心迪祖迪積日前證實重創長抖，相信難以延續連勝強勢，平手盤撐卡爾斯魯厄。 （有線64及203周六凌晨0:30直播）

卡爾斯魯厄中堅馬田史杜爾，早兩日喺訓練期間再次蹠骨骨折，相隔唔夠一年再受重創，尋日接受手術後要長期休養，好在呢位仁兄並非防線核心，影響微乎其微。反而最重要嘅係上輪作客恩高斯達特前，報稱背痛缺陣嘅射手米簡斯基，最終正選登場兼先拔頭籌，今場同狀態弗爆、連續兩場建功嘅阿里巴斯聯手破敵，唔使怕入唔到波。

格雷射手重創火力削弱
客軍格雷特霍夫上季喺德甲包尾，明顯衰在進攻弱雞，今季痛定思痛睇得出喺呢方面下過苦功，佢哋除早前熱身賽對根克勒比爾利吉揸流攤輸波之外，喺德乙及德國盃錄得4連勝佳績，每場都攻入兩球暫列德乙榜首。點知順風順水之際，開咧後幾場踢足嘅前線核心迪祖迪積，喺上輪鬥凱沙羅頓時重創，賽後證實前十字韌帶撕裂有排抖，今場改由梅連斯基與阿斯美擔正，呢兩位後生仔欠缺火候，好難惡得出樣。