車路士今晚打老虎

猪拉多纳

主場對賽逾百年未輸過
莫連奴回歸英超第一擊今晚爆發！「寸王」喺西甲畀人鬧住走，家陣重返英超呢個發迹地，新季目標梗係帶領車路士重奪聯賽冠軍啦！「藍戰士」近年踢開鑼戰特別醒神，今晚主場對住升班隊伍侯城擺明係大炒格，就算讓到「-2」，2.25倍「讓主」都信得過。（now620及621台、廣東體育周日晚11:00直播）

曼車戰前買唔到朗尼就放棄
一向高調嘅莫連奴尋日拉大隊去史丹福橋練波，率先同班球迷打聲招呼，賽前佢貫徹語不驚人死不休作風，先向《標準晚報》批評近年英超強隊質素下降，跟住又向英國《每日快報》透露為收購朗尼Set咗個Deadline，如果當地時間8月26日仲簽唔到「魔童」嘅話，佢就會物色其他前鋒，呢個死線日正正係車路士造訪曼聯嘅大日子，唔通「寸王」想出口術玩心理戰？

侯城目標今季贏10場
點都好，莫帥首要目標係打響回歸頭炮，雖然後衞大衞雷斯、艾斯派古達同前鋒域陀摩西斯因傷同體能問題悉數缺陣，不過車路士人才濟濟，自1905年以嚟主場鬥侯城成百年都未輸過，今晚缺少上述3將根本唔係咩大問題，何況外借回收嘅盧卡古喺季前賽喪入5球，有呢位「新杜奧巴」配合夏薩特同舒賀爾尼攻堅，侯城防線肯定有得震冇得瞓！

侯城時隔3年重返英超，領隊布魯士訂下「贏10場」目標力爭護級，不過亨格比利就唔睇好「老虎仔」嘅開季表現，皆因計埋新加盟嘅侯度史東同積基李華摩亞，佢哋今夏足足有10位生力軍，磨合需時，造訪近14次開鑼戰贏足12場兼狂入36球嘅「藍戰士」，想輸少球都難咯！