西維爾 馬體會 合演西甲壓軸「大」戰！

猪拉多纳

今日西甲「壓軸戰」，有場唔錯嘅戲碼上演，由西維爾主場迎擊馬德里體育會。兩軍今夏都有主力鋒將離隊，但暫時以「張峰」所見，對佢哋嘅入球能力似乎影響不大，今晚雙方碰頭，好可能會合演「入球騷」，撐1.65倍入球大！（now632台周一清晨5:00直播）

西維爾今夏先後賣走前鋒尼格度，以及「右路發難」捷西斯拿華斯兩大主力，好多人都以為佢哋會「雄風不再」，不過睇番西維爾季前熱身賽同歐霸盃外圍賽嘅演出，其實擔心似乎有少少多餘喇！

事關西維爾季前熱身賽贏多過輸，喺歐霸盃外圍賽兩回合仲狂數FK馬拿道斯9:1，之後再喺奧脫福搞寸埋里奧費迪南個紀念賽Party，作客照樣以3:1砌低「紅魔鬼」，足證班波狀態唔錯，起碼冇話走咗兩大天王之後唔識入波先！

馬體會韋拿「惡過老虎」
同西維爾一樣，對家馬體會亦將「入球泉源」法卡奧賣咗畀法甲豪門摩納哥，之後即刻做嘢，斟掂巴塞嘅西班牙國腳前鋒韋拿，論級數，二大殺手唔爭得幾遠，論經驗，韋拿仲「惡過老虎」添！事實上，韋拿係「張峰」十分欣賞嘅射手之一，只係佢近季喺巴塞活喺美斯陰影下，搞到信心同產量大減，今次轉投馬體會重新出發，肯定會場場搏命爭取入球證明自己。只要韋拿有料嚟，場波開大只係時間問題啫。