摩納哥受針對搵蒙彼利埃出氣

猪拉多纳

法甲新富豪球會摩納哥今季開咧戰作客小勝波爾多2粒，認真巴閉。唔知係咪人紅招人妒，近日法甲球圈就以稅務優勢為理由，想話逼佢哋搬返去法國國境，甚至出售法卡奧等球星。球會已經話明唔會理其他人針對，專心踢好波，受咁嘅刺激今晚主場對蒙彼利埃，肯定會打爭氣波，一於捧2.2倍「讓主」啦！（開賽時間：周日晚8:00）

擁稅務優勢惹法甲球會妒忌
地處法國南部嘅獨立小國摩納哥，一向都被稱為稅務天堂，唔少頂級運動員都搬嚟呢度住，貪稅率低吖嘛！對於摩納哥今季買入多名頂級巨星，法國球圈有人相當不滿，話佢哋相較其他法甲球會，因為稅務優勢容易買入更多好球員，係唔公平做法。隨後仲即刻有報道話摩納哥出年暑假要賣走法卡奧整番好條數，不過球會已經即時否認。

力奇對於球會爭拗議題興趣唔大，但相信摩納哥畀人屈完呢鋪，今晚鬥志肯定會格外提升。雖則話摩納哥今仗會有中場摩天奴續抖，今仗又話因為上季踢法乙有球迷鬧事，被罰閉門作賽一場，但擁有星級陣容嘅佢哋，實力始終高蒙彼利埃成截，後者首仗憑地利踢和巴黎聖日耳門，今晚睇怕冇咁好彩。