波圖作客例炒「塞」

猪拉多纳

喺葡萄牙超級盃旗開得勝嘅波圖，今晚聯賽第一擊就會作客出戰塞圖巴爾。塞圖巴爾實力有限，近年主場對住波圖又毫無還擊能力，雷法爾對佢哋今場連可以輸少啲嘅信心幾乎係零，1.56倍「讓球客勝」要捧。

塞圖巴爾失波多過降班隊
波圖上場喺葡萄牙超級盃對住甘馬雷斯，新加盟前鋒歷卡喺比賽早段就用入球證明自己有力打正選，主力射手積臣馬天尼斯唔想衰畀新人睇所以都整番粒。依家呢對組合充滿良性競爭，配合中場路爾斯干沙利斯、迪科亞等人穿針引線，呢兩位前鋒今仗唔愁冇「餐士」大鬥射術。

塞圖巴爾上季聯賽只係僅僅護級成功，但睇番佢哋聯賽失球數字比降班嘅摩里倫斯仲要多，就知呢班波防線有幾差。而且佢哋上季首席神射手美安斯已經離隊他投，家陣可以話係攻不銳守不穩。翻查紀錄，波圖連續6次作客都贏晒，仲要每次都贏至少2球，相信塞圖巴爾今次都好難打破呢個慣例。