釘完甲入閘何太急

猪拉多纳

　　昨文指出賽前巡禮咪遲，亦想講講依家閘前可以改善嘅地方。馬匹去到閘前，必然踱一輪才入閘，但未必場場咁順利，過程中梗有啲馬比較頑皮，可能唔肯就範、大發脾氣；有啲會周身郁，整甩配件，通常閘前助理會搞得掂，安撫完情緒，戴番好晒配件，再重新引領入閘。

　　另外，有啲情況亦較常見，就係馬匹甩蹄鐵，一日賽事之內，經常會發生，要等釘甲匠重新整過，先至可以跑得。好多時呢類閘前重新釘甲馬，往往情緒起伏較大，因為罰企已經忟，仲要畀人搞隻腳一大輪，心情火上加油，而釘完行兩步、畀司閘員睇兩睇又話入閘，隻馬真係幾難會集中精神比賽。

　　其實，係咪應該等隻馬定一定神、預多少少時間觀察，先至安排入閘，咁樣做比較穩當。