車仔維拉旺半場大

猪拉多纳

兩軍史丹福橋駁慣火

阿士東維拉八個月前作客車路士大敗0比8元氣大傷，差啲搞到降班，今次重臨凶地，維拉隊長華亞爾話明唔赦車仔。而車路士喺新帥莫連奴帶領下進攻水銀瀉地，今次兩支當弗球隊英超次輪撞到正，預期哨響即駁火，半場大盤博得過！（now 621周四凌晨2時45分直播）

車路士去年年尾失意世冠盃，返到聯賽搵維拉出氣大勝8比0，嗰場全軍上下個個都有火，八個士哥分別由七個球員射入，維拉門將巴特古辛喺網窩執波執到慌！相隔八個月，維拉今次再去到史丹福橋球場，佢哋挾客場砌低阿仙奴餘威出征，現時信心好強，隊長華亞爾上季冇份喺大敗一役受罪，但都戥隊友唔抵，佢話大軍上季慘敗令佢哋決心更大，今戰會沿用上場殺敗「兵工廠」嘅戰術殺敵。
丹巴巴亞或替費托

車路士舊帥莫連奴重掌球隊後，開鑼戰主場出戰上半場頭廿分鐘狂攻侯城，一班中前場球員快速互傳入滲，主攻踢法好鬼勁。車仔上仗早段入咗兩球後攻勢放緩，主要因為侯城畀唔到太大威脅佢哋，但今場對手維拉啲快速反擊極具威脅，一眾球員都唔會輕敵。從上場演出所見，車路士進攻主力夏薩特、奧斯卡杜斯山度士等都好弗，前線費蘭度托利斯係咁上下料，莫帥有機會輪換改派丹巴巴亞攻堅。

睇番兩軍近季喺史丹福橋球場對戰經常合演入球騷，車仔2010年3月試過以7比1狂數維拉，雙方亦試過踢成3比3及4比4，佢哋近六次喺車仔主場碰頭半場坐底都有兩球交收，鬥得燦爛，今戰可博半場大盤！