維拉有驚喜利記隨時死

猪拉多纳

兩隊Big 4利物浦同阿仙奴上周英超開鑼日同樣主場出擊，但命運截然不同。紅軍雖則僅勝，中前場組織卻頗見生氣，伊亞高艾斯巴斯、史杜列治同菲臘比古天奴嘅進攻鐵三角亦見流暢，今年成績應有進步。兵工廠倚重原有班底，熱身賽成績又對辦，而且雲格開季前嘅豪情壯語「最強之人已喺陣中」，令人期望不斷提高，誰知最終1:3不敵維拉。有球迷認為佢哋衰在留力歐聯附加賽，但亦反映板櫈深度不足兼傷兵成籮，雲格係時候大破慳囊，為球隊、為自己盡地一煲。
艾爾切撼皇蘇難搶分

維拉開季有個魔鬼賽程，兩周內連對三支Big 4勁旅，偶一不慎隨時重演上季開季噩夢。幸好維拉令人喜出望外，就算周中輸畀車仔多少同球證誤判有關，形勢唔差，前鋒賓迪基愈來愈有希斯基影子，今晚首度主場出擊，有力衝擊後防唔多穩陣嘅利物浦。

（now621台周日凌晨0:30直播）

至於富咸亦係上周另一支令人驚喜球隊，打法並不悅目但異常務實，尤其守將軒治蘭特及艾朗曉士，係現役搭檔最耐嘅中堅，配合工兵型中場新兵柏加，今晚或又令阿仙奴吃盡苦頭。

（now621台周六晚7:45直播)

同晚，西甲亦有升班馬艾爾切主場出擊，佢哋上場初到甲組就不敵華歷簡奴，今晚對住喺歐聯附加賽殺敗里昂嘅皇蘇，睇怕難逃一劫，搶分等下禮拜啦！

（now632台周日凌晨1:00直播）