紐卡素勢頹 韋斯咸乘機抽水

猪拉多纳

上個禮拜英超開鑼，曼市雙雄、車路士、熱刺同利物浦都順利贏波，賴低阿仙奴喺主場以1:3大敗畀阿士東維拉，睇嚟雲格真係要快啲出手買人先掂喇！今晚14支英超球隊繼續捉對廝殺，小妹認為暫列榜尾嘅紐卡素迎戰韋斯咸呢場波最好路，相信「喜鵲」即使有主場之利仍難逃一敗，不妨進取啲博埋3.25倍客W！

「喜鵲」喺首戰慘吞曼城4蛋，表現令支持者相當失望！先講進攻，被球迷寄予厚望嘅柏比斯施斯同賓艾化，全場都好似隱咗形咁，雖然史提芬泰萊喺上半場尾段，向阿古路開肘被逐係大敗關鍵，但紐卡素反擊乏力，幾乎連射門都冇，先至係最攞膽嘅原因。
高隊長Hea踢 紐記防線危

講到紐記嘅防線，更加可以用恐怖嚟形容。特別係主力兼隊長高洛仙尼，上仗佢無論係面對同胞阿古路定波斯尼亞國腳迪斯高，一樣好似稻草人咁，畀人話過就過、甩甩漏漏，完全畀唔到人信心。其實高洛仙尼季前已經喺不同場合講過想返阿根廷落班，但紐卡素高層堅決挽留佢，正所謂「留得住個人，留唔住個心」，又點會有好表現呢？
韋斯咸兩老首戰勁搶鏡

有朋友又會拗紐卡素係作客先咁衰啫，今鋪主場出擊會好啲啩，咁諗法就錯喇！事關「喜鵲」主場演出一樣靠唔住，好似上季咁，佢哋19次喺地頭出擊僅錄得9勝，一半勝率都無，咁都仲學人讓韋斯咸平半？制唔過囉。

咪忘記韋斯咸首戰喺主場以2:0輕取卡迪夫城，兩名老將祖高爾同路蘭更相當Sharp醒，食住個勢造訪紐卡素，莫講話保住不敗開下盤，甚至贏埋都唔奇，唔知大家又點睇呢？