保頓前鋒啞火 惡客QPR喪攻先開紀錄

猪拉多纳

唔少人都睇好保頓係升班熱門，估唔到呢班波開季表現咁令人失望，踢咗3輪英冠都仲未開齋，最大鑊係靈魂人物戴倫柏利今晚要停賽，對住勢如破竹嘅昆士柏流浪（QPR）就算有地利，睇怕都唔會有運行，第一隊入球梗係捧1.98倍嘅客隊着數啦！

（開賽時間：周六晚7:15）

係，雖然QPR新季3戰有兩場波先告失守，但相信呢個情況唔會喺今場波發生。事關對家保頓新季喺英冠入得兩球，兩球波都係戴倫柏利建功。呢位28歲光頭佬更加係全隊傳球成功率第2高球員（82.3%），食粥食飯都靠晒戴倫柏利，保頓今鋪冇咗佢，中前場隨時陷入癱瘓都似，第一隊入球？入到波先算啦！

對家QPR新季錄2勝1和，領隊夏利列納講明今仗作客都照攻，計劃派晒查理柯士甸、森莫亞同安祖莊臣落場，當中以新加盟嘅查理柯士甸最有睇頭，佢上季就幫般尼喪入28粒，遇着沉到爆嘅保頓，仲唔乘勢踩多腳咩！