法蘭克福回勇平手盤抵捧

猪拉多纳

今晚德甲布倫瑞克主場迎戰法蘭克福，兩者同樣力爭聯賽首捷，不過新升班嘅布倫瑞克進攻弱過藥煲，缺乏破門板斧，相反開鑼戰意外大敗嘅法蘭克福，迅速重拾狀態，今場足智彩開平手盤，捧法蘭克福最少立於不敗之地。 （有線61、64、201及203周日晚9:30直播）
布倫瑞克鋒力弱過藥煲

布倫瑞克喺聯賽接連面對雲達不來梅及多蒙特呢啲猛嘢，喺守將丹尼斯杜根同漢尼受傷倦勤下僅敗，防守演出算做有交代。不過施蒙積臣、賀查舒捷特等鋒將踢落則明顯唔夠班，撇除多蒙特箭頭「羅拔仔」擺烏龍嗰球，實情佢哋仲未入過波，前線火力弱到咁，今場都係唔使旨意佢哋有乜大作為咯。

法蘭克福喺揭幕戰被哈化柏林怒炒6:1，講真卡爾萬都覺得難以置信，好在班波成功迅速調整，跟手惡鬥班霸拜仁僅負0:1，日前歐霸盃作客阿塞拜疆更清脆以2:0擊敗卡拉巴克，縱有次回合顧慮，但現時手執2個作客入球，晉級形勢大好，相信佢哋今場波會落足全力，務求敲響聯賽勝鼓，憑藉美亞、乾貴士、史堤芬艾格拿呢個進攻鐵三角數胡，1.81倍平手盤可以坐和望贏。