曼車大戰 雙莫鬥法

猪拉多纳

寸王捉鬼最拿手

英超周二凌晨上演超級大戰，「寸王」莫連奴率領車路士揮軍造訪曼聯，「寸王」返咗車仔後力斟「紅魔鬼」射手朗尼，增兵為名，擾敵為實。呢個星級教頭之前帶領車路士十戰曼聯僅一敗，連英倫傳奇教頭費格遜都怕咗佢，區區一個莫耶斯唔係佢對手，車仔受讓着數，1.58倍「讓球客勝」捧得過！

（now 621及620周二凌晨3時直播）

今場賽事焦點落喺曼聯射手朗尼身上，莫連奴重掌車路士後主動放風，擺明車馬將呢個英格蘭球星視為頭號收購目標，呢招其實係效法費格遜上季撬走阿仙奴王牌前鋒尹佩斯，務求做到損人利己，削弱「紅魔鬼」爭標本錢。

雖然現時未成事，但佢已經搞到朗尼心郁郁，就算最終撬唔到人，都可收到擾敵之用，呢招真係好高。曼聯新帥莫耶斯企硬唔放人，賽前仲話朗尼勁有機會喺今場打正選，有心向莫連奴示威。
莫連奴食住莫耶斯

Special One莫連奴係球壇奇葩，連曼聯傳奇主帥費格遜都畀佢剋住，佢嚟到英超率領車仔打倒「紅魔鬼」霸權，04至07年領軍十戰曼聯法定時間錄得5勝4和1負，連費Sir都服咗佢，兩人亦敵亦友，關係微妙。莫連奴同期帶領車路士八戰由莫耶斯領軍嘅愛華頓取得5勝3和，當然，愛華頓嘅實力唔可以同曼聯相提並論，但曼聯當年有老費照住都唔係莫連奴嘅對手，依家改由莫耶斯接手，唔少人擔心佢都係畀莫連奴食住。
曼聯陣容殘過車仔

曼聯今戰續有右閘拉菲爾達施華、快翼艾舒利楊格、拿尼及車仔剋星查維亞靴南迪斯都要養傷，仲未齊腳，前線預期會由尹佩斯、韋碧克同朗尼組成進攻鐵三角，前兩者季初展現理想狀態，論攻力係唔錯。

至於車路士就喺上周中踢多一場苦戰險勝阿士東維拉，本月底又於歐超盃鬥拜仁慕尼黑，搏多一場兼有後顧，睇落蝕章。不過，自莫連奴上任後，大軍進攻發揮明顯有改善，今戰幾近可夫添出擊，有力保持不敗。
領隊Chit Chat

謙遜莫耶斯(曼聯)：於新一代年輕領隊中，莫連奴的確出類拔萃，甚至係最出色嘅一個，所以佢力足執教世界上任何一支勁旅，包括曼聯。我教曼聯當然係為了奪標，亦好期待能同莫帥正面較量。

寸嘴莫連奴(車路士)：費格遜同莫耶斯邊個勁啲？大家唔好玩啦，如果我係莫耶斯，絕對唔想記者再問呢個問題。另外，我覺得曼聯應該賣朗尼畀車仔，咁先唔會削弱英超嘅吸引力，我都唔知佢哋驚乜！