皇馬未執掂作客讓太辣

猪拉多纳

CF格蘭納達有雞偷

西甲好戲連場，今輪由擂台躉皇家馬德里守尾門，佢地將作客CF格蘭納達，「銀河艦隊」今季「肥安」掌帥改踢單防中戰術，搞到攻不銳、守不穩，上仗狂射廿幾腳卻食白果嘅王牌C朗，重臨「烏龍凶地」隨時走晒樣，CF格蘭納達開咧表現對辦，主場受讓一球、球半筍到爆，2.15下盤值博。

（now 632周二凌晨3時直播）

由於沙比阿朗素及伊拿拉文迪因傷缺陣，皇馬教頭安察洛堤索性只用基迪拉一名防中，前面堆砌奧斯爾、莫迪歷、艾斯高等組織型中場，以為可以攻代守，點知搞到進攻雜亂無章，上仗對貝迪斯為遷就艾斯高改踢邊鋒嘅奧斯爾，明顯唔適應表現曳爆被換走，而基迪拉防守覆蓋面有限，貝軍嘅快速反擊針針到肉，令中堅比比及沙治奧拉莫斯非常狼狽，攻守失衡，最終只係靠艾斯高嘅靈光一閃涉險過關。
C朗重臨「烏龍凶地」

唔知係咪受加里夫巴利即將加盟一事影響，C朗為保王牌地位特別搏命，但欲速則不達，上仗廿幾腳攻門卻交白卷，睇得出佢愈踢愈急躁。上季巴塞射手美斯攻陷其餘19支西甲球隊，C朗仲犀利，連皇馬大門都唔放過，呢記「世紀烏龍」正係發生在作客CF格蘭納達之役，今仗重臨凶地隨時影響表現。

CF格蘭納達今夏執到唔少筍貨，包括雷恩中場巴謙美，及免費來投的伊度拉、比迪及里基等悍將，實力有增無減，上仗作客壓住奧沙辛拿來踢，令人刮目相看，食住個勢唔怕問題多多嘅「銀河艦隊」來犯，主場受讓一球、球半仲有逾2倍分頭非常吸引，下盤不容錯過。