利物浦盃賽大起諾士郡

猪拉多纳

紅軍靜極思動，盃賽先癲畀你睇！英聯盃第2圈賽事，利物浦主場迎戰甲組仔諾士郡，主隊有鬥曼聯後顧，料會派波連尼、史達寧等二線兵上陣，但攻力仍在；觀乎紅軍近11次喺國內盃賽鬥低組別球隊都有失波，大細中位數雖調升到3.5球，1.95倍大盤照捧！

（周三凌晨2時45分開賽）

今季利物浦開咧算正氣，雖然首場對史篤城贏波輸盤，但只因冇運射極唔入；次仗作客險贏阿士東維拉，就順利益上盤客。紅軍兩場都冇失波，全因門將米洛列特頻頻「神救」，今仗極可能會用巴利鍾斯把關，後防韋斯頓、法拿根、馬田基利等後備上陣，失波絕對唔奇。
對親低級組別都失波

前線方面，波連尼、史達寧同佐敦伊比將組成三叉戟，佢哋熟習晒球隊套進攻戰術，同樣有威力。對手諾士郡雖然實力麻麻，但紅軍自09年起，對親低組別弱隊都會發波瘟，上季對曼斯菲、奧咸之流共失3球，前季雖大數白禮頓同奧咸，但同樣有失波，今場捧大盤最好。

另外諾域治主場對乙組貝利，「金絲雀」今季仲未開齋，遇弱殺無赦唔止贏1粒，捧「讓球主勝」；侯城領隊布魯士不嬲唔吼盃賽，作客甲組榜首奧連特讓唔起，一樣捧「讓球主勝」。