卡昂有火食塞洩憤

猪拉多纳

今晚阿King對法聯盃第二圈卡昂主場硬撼歐塞爾最感興趣，前者上仗聯賽意外輸波谷埋成肚火，撞正作客唔掂嘅歐塞爾，勢必搵佢做出氣袋，1.65倍主勝有計。

（周三凌晨零時45分開賽）

上季喺法乙排「梗頸四」未能升班嘅卡昂今季火速上力，聯賽連盃賽頭四場贏晒，前線杜咸姆、拿巴等把握力強，喺乙組可謂超晒班，不過上仗臨天光瀨尿不敵特魯瓦，成班球員勁唔忿氣。歐塞爾不嬲係靠主場搵食，一離開自己地頭就腳軟，況且佢哋近四次作客卡昂全部輸晒，遇上滿腔怒火要搵人發洩嘅卡軍，今仗聽做炮灰，一於捧主勝。

另一場法聯盃朗斯對格迪爾，朗斯貴為乙組一哥，實力有番咁上下，格迪爾踢法有前冇後，加埋弗爆嘅三叉戟安達亞施馬、列沙治及卓克尼度耶，唔怕同朗斯鬥攻，入球大最好路。最後蘇聯盃第二圈拉夫流浪對赫斯，後者冇受財困影響表現，愈戰愈勇，上仗人少打人多照贏鴨巴甸，食住個勢可擊敗蘇冠仔拉夫流浪。