哥帥下令 續約要交貨

猪拉多纳

拜仁發火 剷平弗賴堡

德甲今晚有好戲睇，弗賴堡主場對拜仁慕尼黑，唔似爆得出。雖然拜仁開季後未有想像中咁屈機，不過為咗保持球員嘅戰意，據講教練哥迪奧拿落晒柯打Hold住陣中主力嘅續約談判，即係有貨交至可以留低，咁嘅情況熱捧拜仁1.54倍「讓球客勝」有着數。（有線61、64、201及203周三凌晨0:30直播）
艾簡達拿膝傷抖7周

拜仁上季已經係「3冠王」，加埋「地上最強」教頭哥迪奧拿，應該天下無敵至係，不過佢哋喺德超盃慘負多蒙特，之後踢德國盃同德甲，都唔見得特別有霸氣，日前主場以2:0砌低紐倫堡，安聯球場擁躉當然唔收貨。不過哥迪奧拿始終覺得，佢嘅單防守中場陣式，好快就會發揮到巴塞式嘅屈機威力，希望球迷耐心等吓喎！

或者覺得手下班主力未交足貨，原本拜仁高層同洛賓、卻奧斯、謝路美保定同阿拉巴傾緊續約，聽聞已經暫時嗌停，原因係哥迪奧拿要多啲時間去決定邊個值得留低，順便令更衣室有更好嘅競爭氣氛，所以聽佢講延遲續約談判，確保落場球員唔會Hea踢。撞啱上輪聯賽佢哋又有新兵堤亞高艾簡達拿右膝韌帶受創，宣布要做手術抖7星期，依家正好係一眾球員博表現爭續新約嘅好機會，難怪成29歲人嘅洛賓近排都踢得特別肉緊啦！
弗賴堡「拆骨」唔多掂

弗賴堡今季好唔掂，日前作客以3:3打和賀芬咸已經算係代表作，主要原因當然係主力陣容被拆骨，射手馬基亞迪、中場麥斯古斯同後衞富隆全部離隊，雖然新簽入嘅射手美密迪同中場高基連都幾有質素，弊在佢哋上場波分別領紅牌，今場停賽肯定缺陣，好似連個天都唔鍾意弗賴堡咁樣，對住拜仁真係唔知佢哋靠邊個去偷雞，被炒起好正常。
拜仁連續13場有波入

‧計埋熱身賽，拜仁連續13場有波入。

‧拜仁近6次作客弗賴堡，取得5勝1和佳績。

‧拜仁近5次作客弗賴堡，3次開「入球大」。
弗賴堡不設防捧大

拜仁話就話有歐超盃後顧之憂，不過佢哋人腳鼎盛，就算派後備球員打正選，實力都唔會差太遠，唔使擔心攻擊力受影響。值得留意係，弗賴堡今季好似不設防咁，踢咗3場聯賽就失咗8球，中場高基連又要坐波監，冇得落場幫手掃蕩，你叫弗賴堡點頂得住鋒力強大嘅拜仁？就算中位數3.5球照撐2.1倍入球大。