騎師慶祝勿得意忘形

猪拉多纳

　　騎師贏場馬，有時難掩興奮之情，未過終點已經手舞足蹈，舉晒手、企高身，呢啲勝利時刻嘅舉動，可以話人之常情，不過，有時賽後會畀小組話兩句，叫佢哋檢點啲。

　　須防樂極生悲

　　其實，某啲情況下，騎師真係唔可以太過high，隨時會樂極生悲，一個唔好彩，牽連會好大，尤其谷草場合，賽道窄，若果群駒密集齊齊衝線，前面個騎師開心得滯，或者失平衡而「落樓」，隨後而來嗰啲馬，未必閃避得切，咁就大件事。

　　騎師過終點揚鞭，笑到見牙唔見眼，多多少少係可以帶動到場內氣氛，但亦都要睇環境，如果帶離好多，當然冇問題，打兩個空翻都冇人理你，但情況相反時就要小心處理。