車廠大戰捧紅鑽

猪拉多纳

日職快車期爆發「上位對決」，二哥橫濱水手主場大戰三哥浦和紅鑽，兩支名牌球隊各有車廠撐腰，水手獲日產支持，紅鑽就有三菱條水喉射住，兩隊每次碰頭都備受矚目，喺對手主場仲特別肉緊。雙方近十次交手主場一方未嘗一勝，紅鑽受讓必捧「讓球客勝」！

（有線61及201台周三晚6時30分直播）
日產慳家 水手老化

日本兩大車廠日產同三菱一向屬競爭對手，今年佢哋聯手出新車，唔代表真係好Friend，甚至有指呢個舉動只係日產吞併三菱嘅第一步。兩大汽車業巨頭由商場鬥到落球場，橫濱水手背後金主係日產汽車，而浦和紅鑽就由三菱汽車全力支持，兩軍好耐冇喺日職威過，今季齊齊位處前列，令今場爭標「六分波」更有睇頭。

蘇豪今季一直唔睇好橫濱水手前景，皆因日產近年投放資源唔多，大軍冇乜新血，依家只靠四大長老杜查、中澤佑二、中村俊輔同馬昆奴斯撐住，當中最後生嘅中村都卅五歲。水手上場作客鹿島鹿角上半場領先一球，換邊後長期捱打，中後段畀生牯仔大迫勇也連o趙兩粒，最終落敗，四大長老搏足全場，匆匆再戰恐怕好快莫氣。

相比之下，浦和紅鑽近年肯使錢得多，佢哋上年撬走廣島三箭名帥柏度域，先後引入守將槙野智章、森協良太、中場關口訓充及前鋒興梠慎三等優質土炮，人強馬壯，現時僅落後榜首雙雄廣島三箭同橫濱水手一分，今場贏埋隨時可殺上榜首。睇埋往績，兩隊近十次對戰主隊一和九敗，紅鑽近三次作客水手贏晒，受讓必捧！