莫斯科斯巴達呢鋪嚟真

猪拉多纳

首回合半力作客和聖加倫

今晚歐霸盃附加賽次回合場面熱鬧，當中Macot最睇好俄羅斯球隊莫斯科斯巴達，主場迎戰瑞士聖加倫有力輕鬆取勝，1.42倍主Ｗ係過關重心，單頭可以捧埋2.2倍「讓球主勝」。

（周四晚11時開賽）

呢場係附加賽次回合賽事，首回合聖加倫主場賽和1比1，主隊喺比賽末段甚至有機會贏埋，Macot睇完場波，認為聖加倫踢出超水準，不過主要原因係莫斯科斯巴達輕敵，派出超過半隊副選上陣留力俄超聯賽，擺明睇唔起對手，不過斯巴達教頭卡賓喺首回合賽後講明，唔會再重蹈前屆喺呢一輪遭波蘭歷基亞淘汰出局嘅覆轍，打入分組賽決心鮮明，今場會用最強陣容出擊，加上主場之利，形勢當然完全唔同。
教頭卡賓志切反彈

莫斯科斯巴達目前排喺俄超第四位，上輪聯賽作客輸畀阿馬卡，全隊演出受到批評，卡賓當然希望喺歐霸盃攞番自信，雖然主力中堅波捷迪因傷要長抖，不過佢哋已經向安治挖角成功，買入咗巴西中堅祖奧卡路士，防線實力未見削弱。

聖加倫係上屆瑞士超季軍，今季暫時排第五，無論計球員級數同歐戰經驗都輸成條街，今晚作客面對決心嚟真嘅莫斯科斯巴達凶多吉少。