貝迪斯積布尼克愛鬥大

猪拉多纳

新球季歐陸連線Louis首次同大家見面，頭炮推介係西班牙貝迪斯對捷克積布尼克，雙方實力有一段距離，兩軍都攻強守弱，1.5倍入球大係穩陣之選。

（周五凌晨3時30分開賽）

睇番首回合賽事，貝迪斯作客都贏2比1，擺明級數較高，佢哋踢咗兩場聯賽仲未有分袋，分別以1比2輸畀皇馬同切爾達，但兩場比賽表現一啲都唔失禮，球隊踢法極主動進取，尤其首仗作客皇馬幾乎搶分成功，球隊決心喺歐洲戰場攞好成績，今晚雖然有領先優勢在手，但主場對弱旅肯定唔會踢守勢波；Louis呢兩季一直有留意積布尼克，呢支捷克球隊雖然級數經驗不足，但同樣喜愛進攻足球，佢哋近八場正式比賽全部有波入，今仗冇心理壓力下輕裝上陣，當然唔會放過任何偷雞機會，雙方攻對攻入球又點會少？