級數愈高 責任愈大

猪拉多纳

　　上季潘頓爭騎師冠軍失敗，但已贏得外界一致好評，總算到個安慰獎。事實上，佢騎馬真係好畀心機，絕少會出洋相，又好少會惹人反感，整季表現真係比韋達有過之而無不及。

　　不過，老貓也有燒鬚時，上季三月佢騎葉「錦繡河山」出爭田草1400米，處理手法完全唔似一貫潘頓作風，出閘後唔上唔落，搞到隻馬持續難控制，由頭到尾冇段好睇，廿幾蚊熱門就此死火。

　　「錦繡河山」呢場賽事潘頓發揮差到痺，可以講得上係佢上季少數騎法礙眼賽事之一。

　　冇人唔會失魂，騎師亦會冇帶腦返工，但要將次數減到最低，因為佢係專業人士，唔係業餘性質，尤其潘頓呢級數，坐騎閒閒飛三幾百萬，必須做到盡善盡美。