FSV鬼盤捧格雷特霍夫

猪拉多纳

今晚以二線波為主，阿King對德乙直播賽事FSV法蘭克福主場硬撼格雷特霍夫最感興趣，主隊有中場希特美亞因傷上陣成疑，令進攻死火，況且近年對親格雷特霍夫都凶多吉少，擺明冇運行，就算有地利兼受讓都信唔過，不妨捧格軍上盤。

（有線64及203台周六凌晨零時30分直播）
威廉二世禾寧丹大駁火

FSV法蘭克福缺少受傷嘅中場希特美亞，組織力大減，只係靠死球戰術製造埋門，令進攻火力下降。相反榜首嘅格雷特霍夫一開咧演出穩定，近日仲從德甲雲達不來梅借來前鋒富克洛幫手，今仗有機會為新東家披甲，兩軍實力此消彼長。最重要係FSV法蘭克福對親格雷特霍夫都腳軟，近六次交手未嘗一勝，當中更輸四場，勁有格食格味道，難怪主隊有得受讓喇，搭靚個棚氹人落疊，咪貪便宜，質素較佳嘅格軍小讓平半，阿King建議取上盤。

至於荷乙威廉二世主場對禾寧丹，威軍前鋒波文斯腳風甚順，禾寧丹箭頭羅拔穆倫更連續四場有士哥，兩大射手大鬥法勢必火花四濺，隨時合演入球騷，就算中位數調至3.5球照捧大盤。

最後一關西甲華歷簡奴主場對利雲特，華軍剛喺同市打吡戰慘吞馬體會五蛋，球員信心大受打擊，利雲特最識揀波踢，唔介意畀巴塞大炒，但面對同級對手唔會Hea踢，受讓半一，有買趁早。