曼城今晚打老虎!

猪拉多纳

搵侯城出氣 半場大好路

英超是日早場上演雙城會，曼城主場對侯城，同係阿城，但此城不同彼城，巨型班曼城上周啱啱畀升班球隊卡迪夫城打沉，後防缺少大將高柏尼有如不設防，今戰惟有以攻代守，避免再出醜！蚊型球會侯城花名雖叫「老虎」，但班後衞係「紙紮」嘅，普遍得英冠級數，難頂曼城狂攻，預期半場會連番失守，博2.05倍半場大！

（now 620及621周六晚7時45分直播）

「藍月亮」曼城上次作客卡迪夫城畀對手逼到亂晒龍，戰至下半場雖憑迪斯高靚射先開紀錄，但最終竟反勝為敗，真係醜死怪！歸根究柢，佢哋都係後防出現問題，隊長高柏尼受傷休戰，教頭比歷連尼當咗自己隊波係巴塞隆拿，求其搵防中查維加西亞串演中堅，結果梗係出事啦，人哋巴塞長期控住個波唔使點守，你曼城嚟o架咋，醒吓啦！
「英冠防線」頂唔住藍月亮

高柏尼繼續養傷，經過上次失敗試驗後，比帥唔敢再亂嚟，中堅拿斯達錫傷愈踢得，勢將夥拍尼史葛扼守中路，叫做好啲啦，但都要提防近期失晒信心嘅門神赫特再有甩漏，曼城讓球主客和「-2」好高風險，博唔過。不過，曼城攻擊球員始終有質，開咧首戰主場對紐卡素早喺廿零分鐘贏住兩球，只要發揮正常，要喺半場入幾粒鎖定勝局非難事。

「老虎」侯城剛喺聯賽盃同英甲仔奧連特鬥足一百二十分鐘險勝，佢哋幾近以全副選陣容出戰，無論大戰幾百回合都唔會影響今場戰鬥力。侯城今夏引入熱刺孖寶侯度史東同積基利華摩亞銳意加強中場控制力，但佢哋後防仍然用緊占士謝斯達同艾穆罕默迪等只得英冠級數嘅球員，上場聯賽主場鬥諾域治勉強保住不失，今次作客被圍攻好惡頂。　　　
領隊Chit Chat

比歷連尼(曼城)：上場我以為球隊會贏1比0，防守死球係重要一環，我哋上場做得唔好，由今場開始要做好呢個工作。

布魯士(侯城)：我哋想搵個一季入到廿球嘅射手，但呢啲球員通常都好貴，我會努力搵目標，賓特拿係唔錯嘅人選，但佢人工高，仲要再計吓數。