PSG 4「大」Goal手追打甘岡

猪拉多纳

法甲衞冕冠軍巴黎聖日耳門（PSG）上仗打開聯賽勝利之門，主帥白蘭斯同成班球星終於鬆一口氣。今晚「返晒嚟」嘅PSG回師王子球場，迎戰升班球隊甘岡，係時候大炒一場擦靚啲個招牌喇，一於撐1.52倍「入球大」啦！ （now714台周六晚11:00直播）
甘岡耶達巴利腳風順

PSG上仗作客南特全取3分，班球星大帝今晚可以拋開心理包袱比賽，表現應該會愈嚟愈好。新加盟嘅前鋒卡雲尼極速融入隊波，連續2場比賽都有「士哥」，就連另一鋒將拿維斯亦開埋齋，加上翼鋒文尼斯傷愈復出，PSG嘅鋒力根本唔需要懷疑。冇錯，雖然射手伊巴謙莫域仲適應緊新踢法，但呢位上季法甲神射手一向唔衰得，眼見隊友都入晒波，佢今晚一定會加多兩錢肉緊爭取入球，甘岡條防線，又點頂得住「4大Goal手」吖？

尤其係甘岡升上法甲後冇咩重要收購，陣中新兵都係以法乙球員為主，實力好難提升喎。淨係睇佢哋聯賽首戰喺主場對住爭標分子馬賽，踢咗20分鐘都冇就已經失咗3球，今鋪作客PSG再次腳軟，一啲都唔出奇。值得慶幸嘅係佢哋件耶達巴利最近腳風順，近3仗聯賽射入3球，對住連法冠盃在內連續4場都有失波嘅PSG，未必捧蛋而回，既然PSG個「讓主」得1.5倍，熱得嚟分分鐘仲要驚餐飽，咁倒不如轉捧1.52倍「入球大」仲好啦。