阿仙奴殘陣撼熱刺 望演入球騷

猪拉多纳

北倫敦打吡阿仙奴主場迎擊死敵熱刺，「兵工廠」今夏冇乜新球員加盟，季初又撞正傷兵潮鬧兵荒，今戰殘陣出擊。至於熱刺就狂簽人搞到出現人滿之患。不過，無論兩隊出乜人，點都改變唔到近年北倫打吡例演入球騷嘅定律，今戰必捧大盤！

（now 621周日晚11時直播）
再掃基斯甸艾歷臣

阿仙奴今夏「險簽」名單水蛇春咁長，結果只係免費簽咗法國年輕小將耶耶辛洛高同舊將法米尼，實在不得不佩服雲格守財功力。「兵工廠」現時有大批十字軍，中堅華美倫、中場戴亞比、阿迪達、阿歷士張伯倫同箭頭普多斯基全部傷晒，連艾朗藍斯同韋舒亞都有傷，個陣超殘，但都要頂硬上。

熱刺王牌球星加里夫巴利即將為球隊帶來天價轉會費收入，教頭保亞斯唔似雲格咁孤寒，佢好似癲咗咁先使未來錢，繼引入西班牙射手蘇爾達杜及巴西中場荷西保連奴等猛將後，啱啱又簽埋羅馬嘅阿根廷球星拉美拿同埋阿積士進攻中場基斯甸艾歷臣，依家啲人多到都唔知點用，所以有消息指佢有意借走德國中場賀治比，真係奢侈。保帥失控增兵過後，頭兩場聯賽只係小勝1粒，霸氣未現，似乎真係需時磨合。
近6次對戰全開大

一隊殘陣，一隊多新人，豈不是會影響雙方發揮？熱刺開季聯賽連盃賽4場冇失波啵，捧大風險咪好高？唔好諗咁多無謂嘢啦！呢場係北倫敦打吡嚟o架，兩隊仇深似海，近年炮製咗一場又一場經典入球騷，雙方近6次交手全大，「兵工廠」對上兩次主場鬥熱刺都贏5比2，一場入3粒只係基本消費咋！