請給哥迪奧拿多一點耐性

猪拉多纳

近期拜仁慕尼黑這支德甲班霸戰績依然「堅挺」，執筆之時更剛捧走歐洲超級盃，但戰績好不代表球迷收貨，留意一眾拜仁粉絲對哥迪奧拿批評、對球隊表現未夠「精彩」而睇淡其前途，甚至高呼：「不如由森馬接手啦！」
潛在任務 領德足「西」化

嘩！有冇心急咗啲呀！哥帥初嚟埗到有幾耐？有冇諗過如果真係一成不變大家又會話佢冇料到？坦白講，正式開季後往往係贏形勢但入波有困難，贏得唔夠爽拜仁迷自然「不爽」，更揶揄哥帥咪再用巴塞嗰一套亂搞拜仁。其實我覺得幾好笑，那即是說他有Plan B，而Plan B又掂喎。起碼我相信他這「另一手」計劃比起在巴塞時做得更出色，重要係鬥志士氣保持，對車路士戰至最後一刻至追平就知啦！球員仍然信佢，而令德國球隊重拾昔日血性尤其重要，還記得前季歐聯決賽互射12碼時德國人心理防線崩潰嗎？

哥帥另一潛在重大任務，就係間接令近年極力參照西班牙控球模式嘅德國隊有最大得益，你知我知，拜仁球員是國家隊的大戶，由哥帥這西班牙人每天來傳授總優於真正需要受質疑嘅德國主帥勒夫，所以你話我妙想天開也好，我相信西班牙教頭到來係有德國足協幕後Back Up，係戰略性需要，係掀起另一次「足球戰爭」。

所以哥迪奧拿呢次「行動任務」的意義用途可謂超越歷來任何一位教練，至少比起奇連士文……拜仁粉絲更值得給予他多一點耐性。