利物浦雙紅會驅魔 Super Sunday捧當頭起

猪拉多纳

莫耶斯去親晏菲路例冇貨交

近年利物浦畀人標籤做「海鮮波」，皆因佢哋表現難以捉摸，好多波都係應贏就和，應和就輸，激死唔少捧場客。之不過紅軍新季罕有起飛，逆境之下連贏史篤城同阿士東維拉保持100%勝率，運勢明顯好轉，以謝拉特為首嘅戰將都話信心返晒嚟！今晚佢哋喺英超Super Sunday早場同曼聯合演「雙紅會」，正所謂寧買當頭起，對住去親晏菲路都冇貨交嘅曼聯領隊莫耶斯，唔係冇機會偷雞，平手盤一於撐利物浦。

（now621台及廣東體育周日晚8:30直播）

利物浦喺開鑼戰憑米洛列特勇救12碼險勝史篤城，上個禮拜畀維拉撳住嚟砌都照樣攞晒3分，擺到明一副行運格。最重要係隊長謝拉特話，今季陣營士氣同信心都屬近年最佳，有信心可以拉近同曼市雙雄以及車路士嘅距離，鬥心冇得頂。雖然話周中聯賽盃踢得辛苦，加時後先以4:2淘汰英甲嘅諾士郡，但最令領隊羅渣士安慰嘅，係兩位主將史杜列治同佐敦軒達臣弗到不得了，當中史杜列治新季3戰更加場場有波入，腳風順到不得了，今晚隨時又有「士哥」。
曼聯欠霸氣唔易攻得入

今晚開波前會為球會傳奇領隊辛克利鼓掌致敬1分鐘嘅紅軍，躋身聯賽盃第3圈嘅代價唔細，守將阿里施蘇高、高路托尼同中場祖阿倫先後傷出，3人入面以32歲嘅高路托尼缺陣最令球迷擔心，消息話會方未知佢嘅鼠蹊傷勢有幾嚴重，如果佢今仗缺陣，史卡迪爾就會擔正，呢位斯洛伐克中堅上季已經失寵，加上球會近日着手斟介尼史葛，史卡迪爾難得有機會落場肯定會醒醒定定。

對家曼聯牌面係秤先，但自從由莫耶斯今季執掌之後，「紅魔」明顯冇咗爵爺時代嗰份霸氣。就講啱啱場「曼車大戰」，車路士擺到明守勢博攞1分，但佔盡上風兼贏晒控球權嘅曼聯始終咬「藍戰士」唔入，莫耶斯對住防守力強嘅隊伍似乎冇乜「符弗」，想撕破開季兩戰都保持不失嘅利物浦大門似乎有隱憂。再講莫耶斯昔日帶領愛華頓，喺英超22次硬撼利物浦只係贏3場，去到晏菲路更加未贏過，平手盤寧捧當頭起嘅「紅軍」。
謝拉特係曼聯剋星

‧謝拉特近6次英超鬥曼聯攻入4球。

‧莫耶斯歷來喺英超領軍訪晏菲路得6和5負。

‧曼聯對上6次造訪利物浦只曾1勝。
追紅軍1.83倍「第一隊入球」

利物浦新季表現搶韁，連同周中場聯賽盃在內，佢哋開季3戰都喺上半場先開紀錄，今季已經攻入4球嘅史杜列治腳風順到爆，首球要吼實之餘，1.83倍嘅利物浦「第一隊入球」都唔怕追！