巴塞搏盡炒起華倫

猪拉多纳

兩大球王拍住上！

今晚西甲重頭戲，華倫西亞喺主場迎戰巴塞隆拿。「蝙蝠兵團」上星期作客愛斯賓奴只係踢咗半場好波，最後喺領先球下連失3球以1:3見負，今晚仲要對住「地上最強」巴塞，就算有主場之利，都絕對掂唔過。一於力撐有美斯復任正選，有可能同尼馬再度合作嘅巴塞隆拿「讓球客勝」啦！

（now632台及廣東體育周一凌晨3:00直播）
華倫靠普斯迪加蛇都死

華倫西亞2戰入2球，鋒力唔算突出，主因當然同主力射手蘇爾達杜轉投熱刺有關啦，雖然老牌前鋒普斯迪加由薩拉戈薩來投，但講真，呢位葡萄牙國腳有幾多料大家心照，佢又點可能取代到蘇爾達杜吖？事實上，華倫近年財困，主力相繼離隊，今屆更無緣角逐歐聯，連條水喉都冇埋，嚟緊呢班波只會愈嚟愈沉，「張峰」深信即使佢哋今晚有主場之利，亦未必幫到幾多。

隨住開咧戰以7:0大破利雲特有個好開始，巴塞即使周中喺西超盃次回合有美斯12碼宴客，賽和馬體會0:0，但亦能憑首回合尼馬嘅作客入球捧走西超盃，對士氣有一定幫助。球王美斯周中復出，今晚9成9會正選上陣，上仗見佢同尼馬首度合作，默契比想像中好，嚟緊肯定會有一番作為。係，雖然巴塞後防仲有長期傷兵佩奧爾缺陣，要繼續用馬斯真蘭奴客串踢中堅，但呢位阿根廷國腳都已經慣晒啦，根本唔需要擔心。
A山休息尼馬9成擔正

賽前教練馬天奴又走出嚟話，今場波會畀周中西超盃正選上陣嘅阿歷斯山齊士同沙維休息，不過巴塞人才濟濟，使乜驚冇人頂上？最重要係A山唔踢，即係話尼馬好大機會正選披甲，同尋日復操嘅美斯拍住上，咁鋒力咪仲有保證！而且嚟緊國際賽周，巴塞唔使好似上星期咁就住就住，今晚一定去盡，「讓客」有2.18倍咁好分，放心追捧啦！