聖保羅反彈劏魚腩

猪拉多纳

聽朝巴甲有場榜尾大戰，由包尾嘅紐迪高主場迎戰尾二嘅聖保羅，前者戰績已經衰到貼地，近期於聯賽屢戰屢敗，相反客隊聖保羅擺脫季初嘅低迷，演出回穩接連搶到分，今仗作客仲要讓波，擺明有計，一於捧上盤。

（周三早上8時開賽）
作客讓波擺明有計

講到巴甲近期最曳球隊，非包尾大幡紐迪高莫屬，佢哋踢咗15場輸足11場不特止，只係入得9粒，真係非一般嘅魚腩，陣中主力祖奧保羅及馬蘭夏奧均受傷患困擾，今場上陣成疑，眾將愈踢愈冇信心，就算有地利都信唔過。

聖保羅季初表現失常，不但於聯賽戰績下滑，又失落南美超級盃，8月頭更飛咗去德國及日本踢熱身賽，舟車勞頓下影響狀態。好彩經過調整後，聖保羅逐漸上力，近四仗聯賽不敗，今仗仲有兩大射手路爾斯法比安奴及艾萊斯奧刑滿復出，攻力大增，絕對唔赦紐迪高，作客小讓平半兼低水，擺明備受睇好，呢個上盤非常值博。