華素爾防線開窿狼隊有計

猪拉多纳

今晚英格蘭聯賽錦標第1圈，有英甲球隊狼隊主場迎戰同級對手華素爾，主隊今季降班後未有流失大批主力，Keep得住人腳嘅佢哋喺聯賽表現極佳，如果可以將呢個勢頭帶到今場波，要炒起攻守俱弱嘅華素爾絕對冇難度，一於直取2.58倍「讓主」！

（開賽時間：周三凌晨2:45）
射手利治格菲斯擺脫官司

「狼仔」今季降到落英甲，作為呢個級別聯賽入面球員身價最高嘅球隊，當然以升班為目標啦！佢哋近4場聯賽全勝之餘，每場至少入兩粒，最值得留意嘅係近4戰入足4粒嘅主力射手利治格菲斯，呢位蘇格蘭國腳早前喺超級巿場內鬧事，最終被法庭判罰100鎊，總算擺脫官司困擾，依家可以集中精神應戰，「士哥」肯定仲陸續有嚟呀！加埋有另一箭頭施古達臣拍住上，省多幾粒又有咩難度先？

華素爾近4戰喺各項賽事都贏唔到，最近3連敗兼且勁失6粒、只入1球，證明條防線唔係咁穩陣，由車路士借返嚟嘅前鋒米蘭拿高域亦都啱啱傷愈復出，狀態未係最佳，攻守都唔掂，對住態勇嘅狼隊大敗一場都係正常不過吖。