英軍要出線對烏克蘭唔輸得

猪拉多纳

嚟緊因為進行世界盃外圍賽嘅關係，各大歐洲足球聯賽都要讓路。好多香港球迷關心嘅英格蘭，先於周五深夜喺溫布萊出戰摩爾多瓦，然後下周二深夜則作客烏克蘭。

英格蘭首輪作客已經以5比0大炒摩爾多瓦，今仗主場出擊可謂十拿九穩，下星期作客烏克蘭先至係英軍能否出線明年巴西世界盃嘅關鍵一戰。依家英格蘭喺H組落後黑山2分但少踢1場；而烏克蘭又以1分落後英格蘭。換言之假如英格蘭作客烏克蘭全失3分，就好大機畀烏克蘭爬頭。英格蘭到時除咗要贏晒餘下賽事外，仲要寄望黑山同烏克蘭雙雙失分才能出線，因此英格蘭唔想喺最後關頭嘅命運畀人哋控制，作客烏克蘭一仗絕對唔可以輸。

不過，令英格蘭領隊鶴臣最為頭痛嘅係，射手朗尼因頭部受傷將會缺陣。論近況同腳風，史杜列治肯定係最佳嘅替補人選，但佢喺國家隊層面上唔係有太多經驗。考慮到呢場比賽不容有失，一向以保守見稱嘅鶴臣可能會起用經驗較豐富嘅韋碧克作單箭頭，配合5名中場球員，實行以唔輸為大前提。

（now 621周六凌晨3時直播英格蘭對摩爾多瓦）
德國保「首」出線冇難度

另一支獲好多球迷支持嘅德國，出線形勢就比英格蘭明朗得多。德國依家喺小組有5分嘅領先空間，只要能夠喺奧地利同法羅群島身上全取6分，基本上已經穩獲首名出線資格。

（now 632周六凌晨2時45分直播）