日本打真軍半場KO危地馬拉

猪拉多纳

今個星期喺東京拍有線娛樂平台嘅《快樂地球》，當然唔少得去男士們喺天堂歌舞伎町，不過就見唔到呢排Hit爆港、日、台嘅拓也哥囉！我睇日本男仕最喜歡嘅當然唔止歌舞伎町，日本國家足球隊亦都係全民驕傲嚟o架！

日本已經係世界盃嘅常客，當然包括埋下年嘅巴西決賽周啦！日本足球可以話係全民運動，搭車時都見到唔少真草足球場。而喺「孖屐亭」方面，日本人咁叻包裝，就梗係出埋一堆堆好靚同好吸引嘅產品，要班擁躉睇波之餘仲要破費，當中又點少得球衣，不過價錢貴，8算都要過千蚊件，惟有買啲平平地嘅小物啦！
讓兩球太辣玩唔過

小妹覺得而家嘅日本國家隊都算排喺二線頭，實力未必係最強，但加埋拚勁就絕對可以同一線勁旅鬥過。日本上個月主場友賽烏拉圭雖然輸咗，但表現就一啲都唔失禮，重可以提升埋球員間嘅默契添！呢個亦係投X日本嘅最佳原因，因為佢哋真係永冇揸流灘。除咗今晚同危地馬拉拍跳之外，日軍下周二仲會對加納，除咗日職嘅本土球星外，香川真司、本田圭佑等星級戰將都會歸隊，證明佢哋真係好認真咁對待對手。

問心，小妹對危地馬拉嘅認識真係唔多，不過睇佢哋近10場賽事贏唔到都知叻極有限，之前對美國同阿根廷一共失咗10球。小妹前排喺美洲金盃見識過啲北美球隊，大多數都係甩皮甩骨，危地馬拉連決賽周都入唔到，咁大家都知「隊如其名」啦！不過，今場馬會開出「-2」 盤口實在太惡，最近一個月開「-2」嘅盤口，上盤都好難順利開出，穩陣啲都係揀半場主勝算數。

（有線61及201台周五晚6時25分直播）
妹頭推介

日本 半場勝