三獅兵讓2粒 照降「摩」

猪拉多纳

今晚英格蘭喺世盃外圍賽歐洲區H組主場迎戰摩爾多瓦，雖然「三獅兵」有唔少主力受傷，但腳風超順嘅射手史杜列治極有可能及時復出，加埋「老虎仔」禾確特狀態甚佳，夾手夾腳炒起弱旅摩爾多瓦唔係難事，就算讓兩粒都直取1.72倍「讓主」啦！

（now621台周六凌晨3:00直播）

朗尼受「恐怖片式」爆頭重創，格連莊臣同菲爾鍾斯又喺「雙紅會」齊齊受傷，英格蘭主帥鶴臣梗係頭痛啦！好彩今次嘅對手只係踢咗7場外圍賽都係得1勝嘅摩爾多瓦，就算「三獅兵」唔能夠夫添應戰，亦絕對夠班將去年9月作客同一對手時，大勝5:0嘅局面重演一次。
紅軍射手4戰入5球及時復出

英國《衞報》就話鶴帥就算冇咗「魔童」，仍有3場聯賽交出2次助攻嘅禾確特頂替，「老虎仔」話自己已經「大個仔」，喺國家隊都算係經驗最深嘅一群喇，為咗國民肯定會全力搏殺，鬥心十足！近4戰幫利物浦上陣入足5球嘅史杜列治亦及時復出，加埋人氣勁爆嘅英格蘭「新丁」列基林拔，要大炒實力平平嘅摩爾多瓦又有幾難先？
摩爾多瓦冇射手唔識入波

摩爾多瓦陣中雖然不乏俄超球員，例如身為摩國足球先生嘅安治中堅伊普利安奴，但就一直缺乏一名可靠射手，今次陣容中經驗最豐富嘅多羅斯上陣27場只係入3粒，就明白點解佢哋踢咗7場外圍賽都只係入得嗰4球喇，今場真係唔使旨意破到蛋呀！
英格蘭近戰旺開大

‧英格蘭近10戰主場賽事得1敗，摩爾多瓦近10次作客只有1勝。

‧英格蘭近7戰開出5場入球大，其中4場出現至少4個入球。

‧林柏特上仗世盃外對摩爾多瓦梅開二度，並喺6場外圍賽入4球。
三獅兵愛「大」炒魚腩

英格蘭陣中除咗近期人氣勁爆嘅史杜列治入球能力強之外，林柏特亦係英格蘭喺世盃外圍賽嘅主力「士哥拿」之一，加埋「三獅兵」對住弱旅一向唔會手軟，對聖馬力諾兩輪夾埋勁入13粒，上次作客摩爾多瓦亦入夠5球，中位數3.5球都照捧2.15倍入球大。

歐洲區H組