巴西半場大咪走寶

猪拉多纳

澳洲後防老化難擋尼馬

南美勁旅巴西喺主場約戰澳洲拍跳，巴西以無敵姿態捧走洲際國家盃，霸氣十足，淨係一個尼馬都足以玩謝敵軍後防。「袋鼠兵團」青黃不接，後防仲用緊老將尼爾，點頂啊？預期巴西半場已可入幾粒奠勝，捧2.1倍半場大！

（周日凌晨3時15分開賽）

先同大家分析今次澳洲陣容，由於進攻重心卡希爾受傷缺陣，前線預期會用名古屋鯨魚中鋒約舒亞堅尼地攻堅，呢個老牌射手近況都算弗，但球隊作客出戰預咗捱打，查實出邊個打前鋒冇乜分別，都係要靠死球爭取士哥。澳洲前線冇料到預咗，最大鑊係後防都唔掂，年屆35歲嘅防線重心尼爾最近先喺日職球隊大宮松鼠落到班，佢個拍檔奧尼洛夫斯基都已經34歲，兩個高齡中堅唔夠快、轉身慢同冇速度，即使擋得住尼馬，都頂唔到柏圖啦！
鄉親面前唔會揸流攤

南美球隊踢熱身賽從來都唔可靠，巴西上次喺熱身賽不敵瑞士，足以反映佢哋踢太公波時絕對夠膽死揸流攤。不過，今次巴西喺自己地頭作賽，班兵點都要落力多少，大軍能夠喺洲際國家盃技術性擊倒世界１哥西班牙，足見佢哋主場踩行油真係好得人驚，加上巴西下年搞世界盃，點都要保持正面形象，點都會肉緊啲。巴西陣中主要傷兵包括右閘丹尼爾及射手侯克，兩個都唔係不可或缺嘅球員，只要發揮正常，半場已可搞掂澳洲！

猪拉多纳