剛果爭晉級客Ｗ走唔甩

猪拉多纳

世界盃外圍賽非洲區第二圈分組賽上演最後一輪分組賽，排Ｅ組榜首嘅剛果作客對尼日爾。剛果今仗只要全取三分，便毋須理會其他戰果取得出線權。尼日爾現有三分在手全因對手違規所得，佢哋實際踢咗四場分組賽全部輸晒，實力未夠班難做攔路虎，客Ｗ有2.25倍值得支持。

（周六晚11時30分開賽）

非洲區外圍賽踢到第二圈最後一輪分組賽，由於每組只有首名可晉級，所以今輪有多場賽事都關乎邊隊攞到出線資格。目前Ｅ組剛果五戰得十分排榜首，布基納法索九分排第二，加蓬得七分排第三，加蓬雖然數字上有晉級希望，但要贏布基納法索之餘，仲要望包尾嘅尼日爾大炒剛果，機會可謂微乎其微，首名實為剛、布之爭。

尼日爾能有三分落袋，全因首輪外圍賽對手加蓬派出違規球員、被國際足協判輸0比3，如果打真軍，尼日爾其餘四仗全敗僅入一球，屬陪跑分子，嚟到關鍵時刻當然捧戰意十足嘅剛果。
塞內加爾和波達標咪亂捧

至於Ｊ組塞內加爾硬撼烏干達直接爭逐小組首名，塞軍目前領先烏干達一分，今場和波已達標，睇番佢哋今屆外圍賽五戰只係贏過包尾嘅利比里亞，首循環鬥烏干達及兩鬥安哥拉都贏唔到，要讓波純粹因名牌效應。加上今仗移師摩洛哥馬拉喀什舉行，塞內加爾冇地利之助相信會踢得謹慎，波童捧「讓球客勝」。（周日凌晨４時開賽）