川崎「大」久保發火碎紅鑽

猪拉多纳

日聯盃4強首回合今晚連環爆發，頭場川崎前鋒喺主場對浦和紅鑽，一於追1.57倍入球大。雖然川崎今季戰績唔算勁，但已經重現以往喪攻足球風格，加上射手大久保嘉人上星期被旁證屈佢越位食詐胡，有冤無路訴肯定會搵紅鑽出氣，入球大玩得過！

（開賽時間：周六下午5:00）
浦和紅鑽勁失波

上星期川崎作客同大阪櫻花踢成0:0，其實大久保嘉人入咗球波，只不過旁證睇錯話佢越位食詐胡，搞到向來冷靜嘅隊長中村憲剛，當時都鬼殺咁嘈抗議，賽後川崎罕有咁以書面形式向日本聯賽會抗議，認為誤判令佢哋失咗2分，同埋影響大久保嘉人成為日職「得點王」（神射手）嘅機會。

無論點，川崎失分已成事實，與其谷住道氣，不如搵人發洩好過。對家紅鑽喺日職有機會爭冠軍，前兩個月試過作客川崎淨吞4蛋，又曾經被包尾嘅大分三神攻入3球，今場想唔失波都難。不過咁，最近紅鑽射手興梠慎三已經翻生，唔再成為負累，有佢同大久保嘉人駁火，隨時半場未完已經開到入球大！