高地有前冇後大搏槌

猪拉多纳

今日以二線聯賽做主打，阿King就睇中英甲獨腳戲高雲地利主場硬撼高車士打。雖然高雲地利防線猶如不設防，但勝在射手哥林威爾遜入球停不了，適逢高車士打狀態低迷，高地定必火力全開唔會縮，入球大不容錯過。

（周日晚10時開賽）

高雲地利之所以排緊包尾，只因佢哋財務問題被賽會扣咗10分，經過一輪努力已連追8分，回復正數指日可待，並且不斷製造驚喜，近兩主場開出「主其他」及「和其他」。

後防穿晒窿唔緊要，由哥林威爾遜、李安奇勒及比利丹尼斯組成嘅三叉戟全面撻着，索性以攻代守豁出去，其中哥林威爾遜以6球暫居射手榜榜首，腳風順到不得了，高地近四戰不敗怒轟14粒，不愧為英甲入球王，絕對唔係人咁品。

相反高車士打近四仗未贏過之餘，上周中喺英錦作客乙組仔杜根咸竟然輸夠四個一皮，愈踢愈沉，加上尼日利亞守將奧古安哈爾今仗要坐波監，真係雪上加霜，今場難頂高地三叉戟嘅狂轟猛炸。阿King認為淨係靠主隊嘅入波都夠開大，一於捧大盤。
河床當起依絲W

至於巴甲方面，包尾大幡紐迪高近六作客有五次淨輸兩粒或以上，見到都唔開胃，今仗去到勁旅哥連泰斯嘅地頭都係任人魚肉，直取「讓球主勝」。

最後阿甲老牌球隊河床剛於南球盃晉級，士氣大振，主場迎戰近期連波都唔識入嘅堤格雷，主勝手到拿來。