目標唔失波烏茲別克細守城池

猪拉多纳

世界盃外圍賽亞洲區附加賽賽事，烏茲別克首回合作客同約旦踢成一比一，今次返主場出戰牌面佔上風，不過，烏軍最忌畀對手取得作客士哥，今場將會穩中求勝，主Ｗ偏熱唔抵玩，要細盤好過！

（now 671周二晚10時直播）

烏茲別克首回合喺隊長迪積佩洛夫帶領下發揮明顯較好，雖然戰至30分鐘被約旦射手艾拉咸先下一城，但5分鐘後就由迪積佩洛夫建功扳平，取得關鍵作客士哥，今戰若能於主場同對手互交白卷，即可取得晉級資格，嚟緊喺十一月同南美洲區第五位球隊爭取世界盃入場券。
約旦作客腳軟

若果大家有留意開烏茲別克呢支球隊，應該都會知道佢哋並唔擅長主攻，現時佢哋形勢佔優，預期會打得較為保守，盡量避免畀對手取得作客入球。約旦係正宗客場蟲，對上5場作客賽事全敗，加埋只係入得1粒，火力實在太弱，欠缺反擊本錢，今場都係冇乜作為，預期兩隊會合演悶戰，細盤值得一試。