意大利捷克搶W做大騷

猪拉多纳

歐洲區B組，意大利要搶歐洲區出線頭啖湯！「藍衣兵團」今晚主場只要擊敗捷克就肯定出線，戰意非常高昂。「進攻鐵三角」巴洛迪利、奧斯華度、蒙杜利禾坐完波監，猛虎出柙銳不可當。特別係「巴神」首循環對捷克「蒙冤」被逐，重遇仇家，以佢好勝性格，必盡數對手洩憤。領隊柏蘭迪利亦計劃排出352陣式，搶攻做大騷，主W1.42倍乏味，投X首選2.1倍入球大。（now 633及660周三凌晨2時45分直播）
「巴神」受屈誓教訓捷克

意大利領先次席保加利亞7分，今場全取3分嘅話就搞掂，最後兩場可當熱身賽踢，為免夜長夢多，當然要把握地利優勢解決對手。好消息係「進攻鐵三角」復出，可以最強攻擊人腳出擊。「巴神」6月作客捷克，球證認為佢向對手批(月爭)，出示第二張黃牌趕佢出場，但慢鏡顯示對手有「插水」之嫌，令佢受到冤屈，今仗唔好好教訓捷克就唔係「巴神」啦！加上奧斯華度、蒙杜利禾、簡達華同派路支援，入波機會甚高。
352全攻型陣式

意軍中前場人才濟濟，攻力有保證，但防守力大不如前。左右二閘盧卡安東尼利、阿比迪受傷倦勤，消息指領隊柏蘭迪利會改用352陣式，將迪羅斯拖後客串中堅，實行以攻代守，重演6月洲際國家盃有前冇後嘅踢法。

捷克亦要搶分爭次名參加附加賽，嚟到呢個階段冇得保留，其實佢哋中前場人腳唔差，中場路斯基、柏拉斯能傳擅射，前鋒高薩克喺意甲打滾多年，熟悉主隊踢法，隨時偷到雞入波，捧大盤最划算。