德國細炒法羅

猪拉多纳

C組榜首德國今晚將作客對同組魚腩法羅群島，目前德國領先次席嘅瑞典五分，若然今晚贏波，而瑞典作客哈薩克未能全取三分，德國將有機會提前出線，德國今晚贏面高唱入雲，但近期集中火力喺保持控球同不失球嗰度，領先咗唔急於爭取更多入球，「讓球主客和」讓三球，「讓球客勝」又冇分頭，冇乜投X價值，黑柴相信法羅群島冇本錢入波，德國入到三、四球亦會收夠籌，今仗寧取中位數4.5球嘅細盤。

（周三凌晨2時45分開賽）
高路斯入波即破梅拿紀錄

德軍上仗主場贏奧地利三比○，成績令各方面收貨，尤其防線終於可以保持不失，領隊勒夫喺今仗遇弱旅賽前仍然強調不失球嘅重要性，相信法羅群島好難偷到雞，不過主隊有自知之明，失咗波都唔會空群而出，德軍領先後亦會着重控球，唔係咁介意能否大勝。值得一提，德軍老牌中鋒高路斯只要喺今場入波，即可打破名宿「轟炸機」梅拿嘅紀錄，成為國家隊史上入波最多球員。至於陣容方面，史浩克04小將達斯拿將會取代馬高列奧斯擔任左中場位置。

法羅群島出名魚腩，全國人口只有5萬，90年四月至加入歐洲足協，至今最大成就係喺當年年尾歐洲國家盃外圍賽贏過奧地利1比0，不過該隊近年集中防守，雖然輸多贏少，但鮮有被大炒，近期作客瑞典、冰島同哈薩克，都輸一球起、兩球止，佢哋過去曾三度與德軍交鋒，雖然三戰全敗，但最多只係輸過0比3，今晚相信亦唔會輸好多。