作客烏克蘭冇鋒難起浪 英格蘭細細粒

猪拉多纳

世界盃外圍賽歐洲區H組今輪上演前列「關鍵六分波」，烏克蘭主場決戰英格蘭，英軍賽前大鬧前鋒荒，大可以龜縮以一分為目標，話唔定更有利發揮。烏軍上場狂數魚腩聖馬力諾不足為據，呢班波欠缺強攻本錢，相信今戰士哥唔多，蘇豪推介細盤！

（now 621周三凌晨2時45分直播）

英格蘭陣營連番傳出壞消息，曼聯前鋒朗尼整親個頭缺陣，利物浦當弗射手史杜列治又傷，加上「紅魔鬼」箭頭韋碧克要坐波監，而迪科爾喺熱刺坐冷板坐到硬晒軚，佢哋喺今場大戰要靠修咸頓前鋒列基林拔攻堅，聽落都覺得幾可悲。

不過，英軍中後場根基穩固，中場有「雙特」謝拉特同林柏特撐住，仲有韋舒亞幫手，據悉主帥鶴臣想搵埋曼城中場占士米拿頂韋碧克個位，此舉可進一步加強防守力，作客專心搞破壞打突擊，絕對係佢哋嘅強項。
近3對賽全細

另一邊廂烏克蘭上場以狂風掃落葉姿態9比0狂數聖馬力諾，近四戰不敗兼保持不失，攻守發揮都好。無可否認，烏克蘭上年年尾改由新帥費文高帶隊後重拾朝氣，新一代重心球員耶莫蘭高及高路比恩卡亦漸見大將之風，不過大家要留意一點，佢哋近期嘅對手只係黑山及以色列之流，英格蘭爛船尚有三斤釘，即使殘陣出戰但級數唔會差得去邊，絕不容許烏軍為所欲為。翻查往績，兩軍對上三次碰頭錄得勝和負各一，三場都係開細盤，今戰相信唔會例外。