俄羅斯執靚追擊以色列

猪拉多纳

世盃歐洲區外圍賽F組上演出線關鍵戰，目前排次席嘅俄羅斯主場鬥同組三哥以色列，俄羅斯喺名帥卡比路手上正處新舊交替期，不過佢哋喺小組主場保持四戰全勝，始終甚有把握，卡比路為球隊注入新血表現亦開始有起色，今仗於全場爆滿嘅辛尼特主場出擊，面對近況不濟嘅以色列贏面甚高，Anton推介「讓球主勝」。

（周二晚11時開賽）

俄羅斯較早前作客接連不敵葡萄牙同北愛，出線形勢響起警號，卡比路迅即作出調整，上仗執過防線，莫斯科戴拿模嘅格納同庫班嘅高斯洛夫都得到正選上陣機會，球隊演出亦有改善，主場大勝盧森堡重返勝軌，另外幾名新人莫斯科戴拿模前鋒史莫洛夫，辛尼特中場薩多夫同莫斯科中央陸軍守將舒希尼哥夫亦令球隊演出更具生氣。至於主力箭頭基沙哥夫上仗取得入球，狀態同信心都返晒嚟，只要今仗喺主場贏埋以色列，就可以超越葡萄牙重返榜首，戰意一流。
班拿約冇班落遭棄用

以色列上仗對阿塞拜疆，原本以為可以輕鬆取勝進一步挑戰榜首雙雄，點知主場吃悶棍被摸和，而且表現進退失據，睇過程竟然係唔輸都有運嗰隻，演出令人極度失望。以色列今仗人腳唔齊，隊長班拿約遭車路士棄用後仲未有班落，今次亦被棄用，加上主力守將迪比坐波監，作客唔夠俄羅斯砌。