日本有Heart 夠贏加納

猪拉多纳

嚟咗日本拍《快樂地球》呢幾日，其中令我最難忘嘅，就係我以一個女僕造型去秋葉原拍攝時，突然殺出好多「御宅族」。唔係誇張，真係去到旺角西洋菜街都未有咁墟冚。但當我哋去到橫濱時，情況又就完全唔同晒，有好多運動型身材嘅型男嘅呢。莫非日本男仔係會因應身處唔同地方，身材就有咁大分別嘅？
幼細腳法致勝關鍵

今日下晝日本國家隊就會喺橫濱迎戰加納（有線61及201台周二晚6時20分直播），日本上星期輕輕鬆鬆大勝危地馬拉，無論係地波短傳、高空轟炸、冷箭遠射樣樣齊，下半場換入本田圭佑、柿谷曜一朗後，全隊更加認真，果然危地馬拉完全唔夠踢。呢場波對手雖然弱，但日本仍然認真對付，同埋表現出默契，令到今日對加納呢場硬仗打咗支強心針。

無論係技術同身形，加納當然比危地馬拉高一班，但以日本上場嘅表現同狀態，再加上主場之利當然有得打，況且加納嘅正選門將阿當拿臣就已經因傷無隨隊，日本要入波就更加容易。加納班球員所持嘅心態可能都係當呢場同一般「太公波」差唔多，未必好專注，相反呢班日本國腳無論係海外球星或者本土球員，普遍體能唔錯，面對住大大份嘅加納球員未必會好輸蝕。我哋女仔當然最鍾意男人細心啦，日本隊幼細嘅腳法係致勝關鍵，呢個亦係我鍾情日本隊嘅地方。
妹頭推介：日本 勝