巴西2.55倍讓主咪走寶

猪拉多纳

葡萄牙冇C朗 後防又穿窿

巴西同葡萄牙聽朝喺美國波士頓上演表演賽，唔止喺賽前帶摯當地波衫店銷量急增30%，「森巴兵團」亦都肯定會延續強勢娛樂觀眾，由着晒火嘅尼馬、祖奧同埋柏圖領軍，炒起冇咗王牌C朗拿度嘅葡萄牙娛賓，一於力捧巴西讓一球嘅2.55倍「讓球主勝」啦！

（開賽時間：周三早上9:00）

呢場「巴葡大戰」將會喺美職球隊新英倫革命嘅主場「吉列球場」上演，據知喺賽前一星期，門票銷量已經突破55,000大關，極有可能打破呢個球場嘅足球賽事入場紀錄，附近嘅體育用品店仲話有唔少球迷專程嚟買兩國球衣，同埋各種帽飾同打氣用品，銷量都激增3成！

又難怪班粉絲咁熱情嘅，巴西近排狀態非常唔錯，近8場除咗意外輸畀瑞士之外，其餘7戰全部贏晒，開始步入成熟期嘅尼馬喺呢7戰中攻入5球，至於終於克服傷患嘅柏圖上場亦都有進帳，拍住高效率前鋒祖奧，省番2、3粒絕對冇問題。
法比奧干查奧缺態

葡萄牙王牌C朗拿度有傷在身，佢已經講明今場唔會落場，如果上仗對北愛爾蘭唔係靠佢喺15分鐘內大演帽子戲法，葡萄牙分分鐘輸埋！英國《每日電訊報》早前亦撰文抨擊佢哋過分依賴C朗，一旦佢缺陣成隊波肯定即刻「謝晒」，唔怪得巴西隊長堤亞高施華賽前話：「C朗唔出得，我勁唔開心囉！佢最好場場有得踢，咁成場波都會精彩啲。」咁講法，擺明睇唔起呢件甩皮甩骨嘅「葡撻」啦！何況踢左閘嘅法比奧干查奧喺皇馬坐多過踢，狀態麻麻，「葡軍」近兩戰失3球絕非偶然，今場仲要對住近8場有7場至少入2粒嘅巴西，睇怕難逃一劫。
Data King：巴西近8戰贏足7場

‧巴西近8戰獲7勝，其中5戰至少入3球，並有6場開出入球大。

‧兩軍近6次交手，巴西有4戰保持不敗。

‧缺陣嘅C朗拿度喺葡萄牙最近3戰中，包辦6個入球中嘅5球。