日本星級前鋒「大」展拳腳

猪拉多纳

加納正選龍門倦勤

日本今晚會喺第2場麒麟盃主場迎戰加納，相比起上星期五嘅對手危地馬拉，顯然2010世界盃8強之一嘅非洲球隊加納級數較高，就算大部分星級球員唔在陣，出副選攻擊力仍然有睇頭。要知道日本一遇強手，條豆腐防線就隨時會獻醜，最慘嘅係教頭沙哲朗尼似乎無意執番正佢，今場睇怕又係以攻為守，小弟認為今場取2倍入球大最划算。（有線61及201周二晚6:20直播）
沙哲朗尼未執正東瀛防線

日本喺6月去巴西踢咗3場洲際國家盃，表現認真唔爭氣，總共失咗9球，上個月熱身賽又畀烏拉圭炒4蛋，不過領隊沙哲朗尼今次就冇因為「前車可鑑」而特別針對後防改善，佢仲話：「我對我班球員有信心，雖然呢排成日失波，但係其實係同佢哋嘅體能有關，因為之前歐洲聯賽歇緊暑，一時狀態未返嚟啫！」好彩前線仲有本田圭佑、香川真司等頂級攻擊球員，惟有用進攻彌補條防線不足啦！

加納今次參賽，有多達10名球星缺陣，進攻中場奇雲保定、射手基恩同阿休全部因傷冇隨軍，不過有艾度馬同埋基斯甸艾素等攻擊手壓陣，仍然足夠撕破日本條防線。可惜佢哋個正選龍門阿當拿臣鼠蹊受傷宣布退隊，令加納條近6場有5場失波嘅防線再添漏洞，想保住清白大有難度，都係同主隊日本一齊演番場入球騷啦！
英格蘭聯賽盃冠軍賠率